Ulem amenge sar CENTRIFUGA ki mashina shejengiri !

Beshljum jek vakti ki strana (namerno ne aktivno), phenava te kerav observacija so slucinela pes amare romane aktivistencar em dali neshto ka dzal maj anglal.

Rovela pe mange em asala pes mange, keda dikhava sa so slucinela pes ko Romano aktivizam ( thaj politika) koja cachipnaske nashavdili taro teren, kola trebola te oven naj aktivna bashi o shukaripe e Romenge.

Ulem amenge sar centrifuga ki mashina e shejengiri, sapangovaja sigate pa chivena amen ki centrifuga te vrtina amen ko krugo bare brzinaja ema pale te achova sapane, pale te na mrdinel nishto e romanipaske.

A oja mrdinela i ljubomora mashkar amende, razna live ko socijalna mreze, razna precke, organiziribe kongresija ko anav e Romenge ama kote so trebola te mrdina pritisok te kera ( ko gadje em ko institucije) othe nane amen kurazi, daraja te na holjanen o gadje te chinaven amendar o pare kola so dena amen (sar organizacije) ili o licna usluge so dobinena o politicka partije.

Galama keraja sar i mashina e shejengiri keda kerela pli centrifuga, ne sposobna sijem (na dzanaja) te reshina nesavo problemi te astara le taro pocetok pa te zavrshina ole dzi ko krajo, ki Severno Makedonija haberi nane amen kaj sijem ko politicko sistem, ki Srbija gazinena amen Politicarija racisticko lafencar, ki Bugarija pale ko izborija ka koristinen o Romane glasija bizo inkluzija ko sistemi e drzavakoro, em ko okola da javera drzave kote so dzivdinena o Roma.

Vakeraja na sijen organizirime, soj tano fakti, ama sar te organizirina amen keda isi amen mashkar amende manusha kola kerena samo galama sar i CENTRIFUGA ki mashina e shejengiri, em sprecinena te pocminel pes nesavi organizirano zaednica.

Dzi keda ka ova samo i centrifuga galama te kere ko krugo te vrtina amen sar Romani zaednica, na sijen hrabra? Bi dzande sijen ? Chorole sijen? Siklilen samo te roven? Siklilen samo e javeren te napadinen ?

So kergen tumen neshto e zaednicake ?

Trebola te dikha ko jek po buvlo horizonti, chache te chiva o interes e zaednicakoro, cache te dzana so mangaja, soske phravaja organizacije, Politicka partije, keraja kongresija ? Te ova samo popularna ili chachipnaske te reshina amaro ROMANO Problemi ?

But dzene vakerena amen na sijem novinarija nane amen medie, epa amalalen me sar Andrijano Dzeladin kerava buti kozom i tani mi cherga, te oven man financiska em manushikane resursija verujnen deka ka shaj te mrdinav o sistemi, soske ma bistren i uloga e mediengiri nane te informirinen nego o media koristinela pes bashi propaganda me koristinava le bashi Romani propaganda.

I 4to Sila Mok tani i mediumsko sila ko sumnal

1vo tani i zakonodavno sila

2to tani i Izvrshno sila

3to tani i Sudsko sila

Epa Romalen bizo mashinerija bashi Propaganda na resaja nigde, ni ko hrabrost ni ko organiziribe a ni pa ki ideologija !

andrijano

See author's posts