Holjanaja so vikinena amen « CIGANI », so keraja amen te smenina amari slika ?

Keda shunaja ili cithinaja o lafi « CIGAN » amenge sar zaednica avela but pharo soske o lafi tano uvreduvacko kova so ponizinela amen sar manusha.

Ko posledno vreme ko socijalna mreze but cesto peraja ko asavke statusija, kote akoshena amen e lafeja CIGAN, kote piro nezadovolstvo i na romani zaednica upra amende sikavela la direktno ili indirektno omrazaja.

Dzanaja svesna sijem sar zaednica deka taro 1971 bersh amaro oficijalno anav e zaednicakoro tano ROM(i,a), ama adava dzanaja le amen sar zaednica em sikavaja amare chaven, unukon deka amen sijem ROMA a na sijem CIGANIJA.

Ama dali kerge buti o Nevladina organizacija thaj o politicka partije ki promocija bashi amaro indentiteti ko na ROMA ? Adava tano o puchibe soske celo fokus ko adava da hari so kerena buti chivela pe ko Roma.

E akana trebola te pucha amen soske avena adala navredliva lafija prema amende sar zaednica ?

Tikno broj tari amari zaednica bichavela asavki slika ko na Roma em but dzene amendar da vakerena « so kerena be akala, cergarija narodo ladzakerena amen », adaleja so mangena peske ko ulice, semaforija, parkija, grobija em sekola thana kote isi narodo te shaj pruzinena piro vas te zaradinen nesavo dinari te shaj ingarena jek kotor maro pe chavenge, ili pa nesave te shaj dzana te khelen komarija ili pa te keren peske zefko pijbaja alkohol.

Akana palem adala so ka chitinen ka vakeren « abe akava andrijano sa neshto ov dzanelal ili vakerela »

Oja vakerava i realno slika so trebola te dikha la sarine sar akterija.

Akate shaj astarela pe o Nevladina organizacije kola kerena buti ko asavke proektija, kola trebola kerindor buti e zaednicaja isto aghar te keren buti em e na Romencar, soske lenge da trebola istorisko identitetsko so-gragjansko edukacija, deka o Roma nane tane CIGANI, a tari javer strana o Nevladina organizacije isto aghar sar korektorija e Vladino manushenge, Politicko Partijenge trebola te den nasoke sar te chiden pe adala manusha taro akala negativna klishe (slike) em te ciden pe tari ulica ili pa taro lengoro zanati te MANGEN peske em te pruzinen piro vas.

A o Politicka partije kola trebola te ovel len politicko vlijanije pire koaliciono partnerencar, te shaj kerena socijalna uslovija akale manushenge te chiden pe tari ulica, em te bichavel pes po javer pozitivno slika.

Ama nazalost o Politicka partije biknena samo balval ki Romani zaednica em ko pire Koaliciona partnerija demek ola isi len glasacko telo em ola tane ko so 6 izborna edinice faktorija te shaj o koaliciona liste e Romane glasoncar dobinen 6 dzi ko 7 pratenikija.

Seriozno ushten taro « Disney » suno, dosta dikhlen bajke dikhen astaren tumen ki buti em zaednicko reshinen o problemi, za da posle ma te ovel tumenge pharo keda ka phenen amenge CIGANI.

Samo te potsetinav tumen deka ki Komisija bashi chinavibe em zashtita tari Diskriminacija isi amen Rom o rajo Kamberi.

andrijano

See author's posts