Sine peske jek dive, Em nakhla adava dive

Sine peske jek but shuzo dive, 8to April 2023 bersh kote so ko but vile cangavga i jak e Romanipaskiri.

So smeninga pes taro avgo kongresi ko 1971 bersh ?

52 bersh palo ikeribe o avgo Romano kongresi, o Roma ule po glasno po galamdzije po vishe vazdinga pe o Romano bajrako ko akava dive, ama o fondatorija o prva manusha kola tane sebepi bashi akava kongresi sigurno ko po grobo vrtinge pe nekozom puti, adaleja so o avdisutne generacije na halile soske tano adava dive em savo progres trebola te kerel pe.

Chache em pozdravibaske tane sa o inicijative kola sine kerde ko adava dive, taro individualcija, taro institucije, politicka partije, nevladina organizacije sa okola kola so mangle te vazden adava dive.

Ama vazdingem adava dive sar Znzarija, kergem galama adaleja achilem, So podobringem amare zaednicake bashi ko naredno periodi, savo angazmani lelen taro institucije, drzave o Vlade ?

Dali i cel tano koj te ovel po istaknimo javerestar ?

Primer ki Severno Makedonija ko isto dive thaj ko isto vakti ikerge pes 2 nastanija, 1 konferencija em jek podelibe plakete ko sobranije e Drzavakoro.

Sa tano shukar o vazdibe bajrakija, ikeribe khedibe phiribe ko ulice, kulturna manifestacije itn. Ama dali adava trebola te kera ko amaro Drzavno Nacionalno Prazniko oups nane amen Drzava, ama isi amen nacija.

Ko maticna drzave kaj so dzivdinaja sa o Roma, keda tano lengoro drzavno nacionalno prazniko so kerena ola adale diveste ?

Kerena vojna parade ( amen vojska nane amen)

Sikavena pi sila (Amen sila nane amen)

Beshena sarine pala ko nacionalno bajrako (amen ? )

Na dzana ko javera institucije, nego olende avena o javera

Trebola te haljova jek buti, deka ko akava nacionalno prazniko so mukle amenge amare anglutne taro 1971 bersh, deka amen trebola te kvantifikujna o uspehija, a na te degradirina adava da soj muklo amenge.

Te la jek primer, o Prvo IRU kova sine kerdo ko kongresi avdije isi amen 4 ili 5 IRU ko povishe drzave kote olendar da avela i zabluda ko Roma, kote o Roma da nasavena piri doverba ki akaja institucija.

O dzajbe ko gadzikane institucije ko adava dive tano samo kamuflaza e 364 divengoro kova so trpinela i Romani zaednica ko adala drzave, o sistemsko mudaribe, o na dejbe uslovija te podobrinel pes amari situacija, diskriminacija em panda but javera bukja kola so osetinena len sekova dive o Roma samo adaleske soj tane ROMA.

Implementiribe, pishibe, akciska planija e Strategijakiri ki RSM tani kerdi taro isto krugo manusha kola so vrtinena o napredok e Romane zaednicakoro bershencar ko krugo.

Dali lengro interes nane tano te reshinel pes i problematika e Romengiri, adaleja so ako reshinela pes o problemi ola ka achoven bizi buti thaj bizo pare ?

isi panda but javera bukja so shaj vekoncar te diskutirina len te debatirina len, Ama te pocmina prvo mashkar amende te haljova amen sar zaednica te ova po organizirime em cachutneste te besha pala amaro slogani OPRPE ROMA

andrijano

See author's posts