février 14, 2025

24h Information

"Nashti uvek te slozina amen olencar, ponekad mora te ova protiv olende"

Kosovake Parlamentarune Alosaripya

KOTOR 1

Sar manush kova si hor dedikimo pe demokraciake that socialune hakayipaske vasnipya, dengyum alav korkoro mange kay na ka phiravav ni dav phiko (ko nisavo drom) nikaske ko Kosovake Parlamentarune Alosaripya kola ka adikergyon ko 9to Februari 2025. E frustracia thay dekuraipe e amare politikune spektrea konsumingyama ko niveli kay te beshav dur akalendar sine moro yekhuno aqhilo drom vash te rezistinav. Palem, ini palo mere may bare tentipya, diso andar mande – bi aqhavdo thay persistuno avazo, refuzinela te traynel thay te ovel bi angazhimo.

Sar manush kova kergya buti e ververutne komunitetenca ani Kosova ko nakhle duy deKade, sinema shaipe te dikhav bare bajakya e reziliencako thay lidershipesko. Inspirisalum kotar o individya kola, palo sah pharipya, ushtinde vash olenge komunitetya thay mardepe vash hakayipe thay sahastaripe. Vash mange nikana na sine mahatno ko lela o phiravipe, so sine mahatno kay yekhoro te phiravel. Vash yekh lugo vahti, akava dengyama pakyavipe.

Truyal mo personaluno thay profesionaluno dromipe, buderi mentorya (thanutne thay mashkarthemutne) ulavde mancar olengo pakyavipe pe Kosovako potenciali – tikni rashtra koya, palo sah pharipya, dela bare shaipya. Thay palem, palo buderi bersha, nashti te kerav bi puqlo: sinelen sahipea hakay? Si akava than vash shaipe vash savore – ose numay vash disave? Te ovav may klaro, na kritikinava e Kosova sar rashtra. Si o than kote e pakiv shay jivdinla. Buderi amendar kerde buti bi aqhile te kreirinen may shukar avipe vash sakaske, bi lelo pe dikhipe o etnikuno peripe. Palo sah, diso ulo ij so khelavgya sah me kokala.

Ji phirgyum truyal e Plemetina, panj ver pashile panj verver manusha. Sakova puqlama vash e vota ko avutne alosaripya. Thay akana avla o pharo kotor: Savore olendar vizitinena sine romane mahale thay ofertinena sine lekanipe. On na puqle numay vash miri vota; ofertine mange ini love. Akava, qhelalipea, na si niso nevo. Bershenca akana, savore dende alav kay mangena te yaverinen. On publikipea deklarinena kay shay te keren o sheya sah yaver …numay sar? Keripea o som sar so dikho yaver kergya anglo 30 bersh?

Vash mere romane thay na romane amala, datumen diso vash so shay te gndinen …

Tumari vota si mahatni. Sila o zoralipe te kreirinel qaqutne, lugevahtune yaveripya. Numay odole zoralipea avla vi o godornipe. Anglo te decisinen ko hakedinla tumari vota, len hari vahti te drabaren, te shunen, te puqen te angazhingyon …. Studiraynen politikune partienge platforme, analizinen olenge programya, thay puqen korkore tumende: reflektinena mi on tumare vasnipya thay vizia kola silen vash amaro amalipe?

Ma mekhen kay tumari vota te ovel tiknardi ani transakcia. Keren kay te ovel deklaracia vash tumaro pakyavipe, tumare mangipyengo thay aspiratyengo vash yekh may shukar Kosova.

1/10…. KA LUGYAREL

About Author