Besljum em dikhljum tari strana, so kerena amare LID(L)ERIJA !

Panda nesave dive nakhela akava da 2024 bersh, bersh kova sine pherdo e Romanipaske.

Oja pherdo mislinava ko adava so amen da sar nacija unapredingem ko aktuelna trendija, sar na primer, koristibe o posledna IT tehnologije socijalna mreze, keribe sa po shuze em po shuze bijava, o orkestarija ule but po moderna sar ko instrumentija aghar ki piri licno garderoba, o kamermanija taro HD nakhle ko 6K em red panda javera bukja kola sigurno sar Romani nacija na propustingem len.

Taro akava aspekti o Roma na zakasninaja, ama ako dikhaja o politicko aspekti ili o manusha kola prestavinena e Romen ki politika mislinava kaj 100% utkingem la, keda mislinava utkingem la kerava lafi amenge sar zaednica a na olenge sar POLITI-CAJRA, soske lengiri buti (lenge) dzala anglal no avaja ko adava so dzi keda ka dikhen samo peske a na e zaednicake ?

Nakhle o izborija, lele pozicije koj Ministeri bizo kasa, koj zamenik ministeri, koj rakovoditeli, koj ko upraven odbor, koj akate koj okote sa so nepotizam ola pa ola !

Dali panda shaj te dozvolina amenge sar nacija asavko LUXUS ? Te dikha olen taro sostanok ko sostanok, taro nastan ko nastan, osven promotivna slike bashi o socijalna mreze, sikavge li nesto e zaednicake, deka soj tane ko adala pozicije isi soske, sar so dzala o redo jekhe minoritetno zaednicake ki nesave drzava so dikhela o interesija e zaednicakere te chivel len ko prioriteti a na pire turisticka promotivna avanture te afirimirinen len ko socijalna mreze, saj pa afirmirinena pes ko adala mreze te shaj kerena panda pare taro like, share vues etc.

Sar koaliciona partnerij ki aktuelno vlast, na shungem ni jek Romani partija te postavinel o puchibe : SOSKE NANE AMEN ROMANO PRATENIKO ?

A ni pa i OPOZICIJA (ako isi amen opozicija Romani) na kerga nisavi javno reakcija ili pritisok te respektirinen pe o minoritetija thaj lengiri zastapenost.

Sigurno dzanena em svesno sijen ko adava deka isi amen PROBLEMI e Romane zaednica :

Socijala, zdrastvo, domovuvanje, obrazovanie, pravicno zastapenost, vrabotuvanje, diskriminacija em panda javera bukja kola tane prioritetna e zaednicake, a za da te reshinen pe akala PRIORITETIJA potrebno tani Politicko sposobnost te shaj anena politicka promene thaj te len politicko odgovornost, ama sar so dikhaja nane amen panda asavki jasno slika ki Romani politika, amari tradiocionalno slika achili isto ko 33 bersh, korupcija, nepotizam licno interes, a te phravgan to muj te bunine tut tegani amare LID(L)ERIJA ovena kaubojcija em kerena tuke zakane em sikavena pire muskulija.

Adaleske te nadina amen ki poshukar thaj po reprezentativno politika e Romenge ko 2025 bersh.

Ako sijen cachutne LID(L)ERIJA, len o bukja ko vasta, soske ako dikhena tumen sar POLITI-CAJRA mangava te obavestinav tumen deka o Roma na hana CAR.

Inace, tumare propustija motivirinena man ko 2025 bersh te iranav man pherde energijaja, soske o Romano mediumsko prostor bizo mande tano Cucho.

Romalen Bahtasa, tumen dzanena sar trebola ko naredna Izborija !

About Author

andrijano

See author's posts