
E Kosovaki Konstitucia garantinla minoritetengo reprezentipe rezervipea yekh parlamentaruno than vash romane reprezentya, mashkar o thana vash yaver minoritarune grupe. Ji kay akava sigurinla kay o Roma thay yaver minoritarune komunitetenge grupe silen avazo ano Parlamenti, pe ayni vaht kreirinla pharo alosaripe vash votantya: ko amaro suro amen simen duy romane partie kola kerena kompeticia vash akava yekh than, shay te ovelmen duy reprezentya sar so sinemen ko nakhle 4 bersha, numay qaqipea na gndinava kay akana shay. Akava kerla krucialuno vash o komuniteti te votinen strategipea vash te sigurinen kay olenge reprezentya dena servisi olenge interesenge.
O avutne alosaripya si shaipe vash o Roma te sikaven olengi politikuni prezenca, numay akava shaipe si umlavdo sah pe zoralipe e olenge votengo. Palo sah, akava shaipe avla ini e pharipyenca. Ini soske o rezervimo than garantinela niveli e reprezentipasko, pe ayni vaht limitinela romane komunitetesko shaipe te influencinel may dur politikune decisie. So si may phare, teluno gendo e iklipasko pe votipe sine savahtuno problemi (ko nakhle parlamentarune alosaripya o iklipe sine 48.78%). Buderi Roma shungyona hohavde kotar o politikune partie thay dikhena but hari konkretune bajakya vash te adresinen olenge mangipya thay ambicie. Leipea kotor pe akala alosaripya, o Romane votantya shay te sigurinen kay olenge avazya te shungyon thay te nakhen yekh bajako angle direkt o qaqutno yaveripe (shay te ovel “mayBE”)?
Sar si pe 2024 Populaciako Registripe, ani Kosova jivdinena 8,730 Roma. Mashkar lende, sah o dizune kola si may ophure desar 18 bersh silen votipasko hakay, so manglal te phenel kay akaya grupa sila o potenciali te kerel mahatno impakti ko alosaripyengo rezultati, e 4,374 romane individyenca kola si mashkar o bersha 15 thay 50. Akaya terni demografia so sheruni pe zoralipe e komuniteteske politikune kotorleipasko.
O votantya musay te keren yekh detaluno dikhipe pe sah so ofertinela sakoya partia. Musay te puqen korkore peste: Ko qaqipea halola amare komuniteteske mangipya? Koya partia sila klaro plani te lelpe e puqipyenca kolenca amen arakhape? Sar shay me te ovav o yaveripe? Respodipea ko akala puqipya thay prekal godyalo votipe, o Romano komuniteti shay te sigurinel kay olengo reprezenti si manush kova qaqipea ka kerel advokacia vash olenge interesya. So mangava te phenav si, VOTIPE SI BUT MAYBUT DESAR HAKAY-SI GODORNIPE!!! Romane komunitetesko thay yaver minoritetyengo thay mazhurantengo kotorleipe ko avutne alosaripya na si numay pheripe e konstitucionalune obligaciako; si shaipe te den forma olenge kolektivune avipaske.
….Mangava ted av sama e mahatnipasko e khetane aqhipasko. Simen shansa te sigurina mayshukar avipe vash savore komunitetya ani Kosova.
2/10…ka lugyarel!
More Stories
Namesto branitelija e Romane interesenge, ola tane cuche portparolija e Vladakere !
Kosovake Parlamentarune Alosaripya
Besljum em dikhljum tari strana, so kerena amare LID(L)ERIJA !