mai 28, 2024

24h Information

"Nashti uvek te slozina amen olencar, ponekad mora te ova protiv olende"

« Keda o čobani ovela dušmani pe bakhrenge »

Taro samo naslov shaj anena tumenge slika razna situacije so slucinela pes amende ki amari zaednica.

« Keda o čobani ovela dušmani pe bakhrenge », oja aghar mangava akaja (cachutni) paramiz te pishinav la so sar konstantacija shaj keraja ko nekozom bersha na palal so desinela pe ki amende bashi adava famozno « JEKHIPE » so rodaja le ki amari zaednica.

Sarine dzanena koja tani i buti jekhe čobaneskiri, taro tiknipa te lel bakhren em te parvarel len, te phiravel len em te bajrarel len dzi ki jek odredeno tezina pa palo adava te biknel len, ama but retko o čobani chinela adale bakhren em licno ov hala len, soske zalinela len, dikhla len sar barile shaj po celo rat na sovela sine em kerela planija strategija, ki savi char te inagrel len te han em te oven zorale.

Epa adava da slucinela pes ki amari zaednica dali ko politicka partije ili pa ko nevladin sektor, arakhena len , hraninena len dzandipaja, taktikaja, kapaciteteja ama keda cidena pe lendar tegani oven lenge dusmanija, adaleja so ili zakaninena pes olenge, ili nastetinena zakaninena olenge dzanindor lengere privatna bukja em adaleja posle ovena olengere dusmanija.

O fakti tano deka tari 1 politicko partija avdije mnozinge pes ko pobuter Romane Partije sa adava taro dusmanluko ili inati, taro nekozom nevladina organizacije mnozinge pe javera da organizacije sa so cel te keren zulume e javere partijenge ili organizacijenge adale dusmanlukoja ko jakha.

Cache i deka e čobane isi le pare te kinel hrana e bakhrenge, ili isi le nesavi mok upra lende, ama so shaj kerela o cobani bizo bakhre ki planina? Shaj samo te dikhel peske taro uchipe te zamislinel deka tano o jako manush a ustvari adaleja kerela peske samo iluzija.

Adaleja so akana ulo moderno, o dusmanluko na avela direktno e cobanestar, nego o chobani arakhela javeren manushen kolen so pherela len nesave nadaja deka ola ka oven o super heroja e gaveskere.

Dali trebola te kera dushmanluko e bakhrenge ( amare zaednicake), trebola li te la o primer javere zaednicaengoro, sa adava zavisinela korkori amendar.

Ko teksti koristinena pes fiktivna licnostija ( o čobani thaj o bakhre) bizi nisavi namera nekoj te arakhel pes mashkar o čobani ili mashkar o bakhre.

About Author