So (NA) ka dobina ko naredna parlamentarna izborija ki RSM ?!

O izborija avena sa po pashe em po pashe, amen sar stalno ko akala 30 bersh sovaja ili pa o manusha kola so mangena te bavinen pes politikaja ki severno Makedonija sovena, em dzangavgovena ko posledna minutija keda sa i vec dogovorimo mashkar o Gadje em o javera etnicka zaednice.

Prioriteti momentalno ki makedonija tano sar o Makedoncija te arakhen piri drzava te na nashaven la, adaleja so dzanaja deka ko palune bersha dikhaja i politicko, ekonomsko ne stabilnost ki akaja phuv.

Prvo problemi sine o anav e Grckaja koja odobor bersh chivela sine po veto bashi o khuvibe e makedonijakoro ki NATO Alijansa, ajde adava sredinga pes e prespansko dogovoreja kote so i Makedonija smeninga piro anav thaj uli Severno Makedonija.

Palo adava i Makedonija rodela te khuvela ki evropakiri Unija, kote so akana i Bugarija chivela piro veto bashi piro malcinstvo te ovel chivdo ko ustav e Makedonijake, no akate ikljona po javera problemija e drzavake o SDSM pire koaliciono partnerencar mangena te smeninen o ustav, a dzi kote i Opozicija VMRO adava na mangela bizo uslovija, nego chivde tane uslovija te dzal pes ko pred vremena parlamentarna izborija, ili pa te dogovorinen pes te kerel pes promena e ustaveske pa odma te dzal pe ko parlamentarna izborija.

Akate o Romane politicka partije nane tane ni konsultirime bashii o aktuelna politicka prasanja, a ni pa tane konsultirime bashi o prasanja soj tane phanle e Evropsko unijaja. nego o romane politicka partije tane ikerde (bisterde) ki strana sa dzi kote na avela o dive e izborengoro pa te len olen jekhe po jekhe ko vasta (zakanencar, ucenibaja, bikibaja) em te kheden lenge (gadzenge) ko interes o nekozom 40.000 dzi ko 45.000 Romane glasija ki celo teritorija e Makedonijake.

Palo sa akava akana mora te pucha amen « SO (NA) KA DOBINA KO NAREDNA PARLAMENTARNA IZBORIJA) », soske ni jek Romani politicko partija na sine aktivno ko akala 3-4 bersh ki politicko scena ki Makedonija, ni jek politicko partija na sikavga piro ne zadovolstvo, revolt bashi celo vkupno tretmani soj kerdo e Romencar ki akaja drzava.

So (na) ka dobina, pale ka nadinen pes bashi poedinacna zdelke t.e te len ola nesave pozicije, te vrabotinen pe pashe manushen em X red javera licna interesija, ko lengere mitingija ka oven naj glasna pumare partisko znamencar te sikaven e gadjenge deka ola vredinena em deka ola anena o guzve ko lengere mitingija.

So (na) ka dobinen taro sa akava so kerena le olenge ? So korist isi e zaednica taro asavko plani kova i vec bershencar « DEJA VU », i zaednica mangela promene ko politicko sistemi, na mangela vishe te ovel la zakane bilo save politicko partijatar, na mangela vishe te ovel podcenimi te biknel pes lengoro glaso, te oven ladzarde ko vreme taro izborija ko Medie deka ko romane mahale biknena kinena pes glasija.

Sa akava tano puchibe dzi ko Politicka akterija, ako isi amen asavke ki Severno Makedonija, « So (na) ka dobinen ko akalal parlamentarna izborija »?

Ili pa shaj amen pogreshno analizirinaja, shaj o Romane politicka partije tane naj spremna ko celo sveto te mobilizirinen pes thaj te organizirinen pes nekozom masekonge, ama adava dzanaja le deka ni ko realnost a ni pa ko suno za kratko vreme shaj organizirinena pes em anena poshukar tajsa e zaednicake.

Pale palo izborija o edinstveno lafi so ka shuna  » O gadze na dena e Romen » a so kerena o Roma te oven faktoria te bi shaj ola lena so trebola e Romenge bizo te adzikeren taro gadze, sar so dikhaja primerija o javera etnicka zaednice sar lena pe narodoske so trebola len.

SO (NA) KA DOBINEN KO NAREDNA PARLAMENTARNA IZBORIJA ????

About Author

andrijano

See author's posts