Nashti ocekujnaja but promene, soske nane amen Politicko Kultura !

Politcko pazari, kerela i sudbina e Romengiri.

Sekova izborno ciklus tari nezavisnot e Makedonijakiri isi le isto scenario – o Roma taro jek puti ovena « Kljucno faktor » ko politicka pregovorija. O po bare (Gadzikane) partije taro sa o strane prastana ko Romane mahale te kheden o Romane glasija uz pomos e Romane partijenge thaj lengere liderenge, kote obecinena poshukar dzivdipe, inkluzija, ednakvost, obrazovanie, zdrastvo em ekonomsko poshukaripe. Ama o chachipe dukhala keda dikhela pe so slucinela pes palo adava izborno karnevali, o realna pregovorija mashkar amare politicarija em adala politicarija na anena nisavi korist e zaednicake nego anena korist OLENGE save e gadzencar ale ko amare mahale em ulice thaj obecinge amenge poshukar tajsa!

Bershencar napalal dikhaja indenticno shema, o Romane politicka partije khuvena ki koalicija e pobare partijencar, kola samo dogovorinena peske pozicije ko institucije kote but hari adala pozicije pridonesinena sushtinska promene e zaednicake, kratko-trajna privilegije em simbolicno prisustvo ki vlast bizo nisavi mok. Palo formiribe e vladake, na samo so tane svesna deka na kerge shukar pazarluko e zaednicake ko korist, nego plus posle pocminela i andre koalicisko borba mashkar ko Romane partije, shpionlukoncar, keribaja lafi palo dumo jek jekhestar koj povishe te ligavinel pes e Premiereske te del len nesave troshke te shaj sikavela pes deka tano ov naj pashe e Vladatareja, a ko realnost kerela shteta celo Mileteske.

Ama, so ovela palo adava, o Romano puchibe pale gurinela pes ko margine, a o politicka dogovorija dende sar vetuvanje anglal ki zaednica achona bisterde. O vrabotuvanja soj obechime e zaednicake pretvorinena pes ko partisko thaj familijarno vrabotuvanje, o infrastrukturna proektija ko romane mahale achona samo ko lil ili ko video zapisija ko socijalna mreze, a pa ic ma te kera lafi taro sa okola problematike so za vreme na izbori obecinge len sar te phene isi le magicno stapce em odma ka reshinen len, shaj te reshinen len ako pregovorinena anglo o izborija kljucna tocke save ka anane sistemska promene, ama za da te anen o sistemska promene trebola Politicko hrabrost em odgovornost, a amen isi amen li asavke hrabra politicarija soj tane spremna te zrtvinen po licno interes ko interes e zaednicake ?

Jek taro kljucno problemi tano, so o Romane prestavnikija panda funkcionirinena sar zavisna partnerija ko politicka igre, namesto realno politicko sila, namesto te nastapinen edinstveno em jasno politicko agendaja, ola khuvena ki trgovija e Romane glasoncar kote o licna interesija dobinena prednost anglo o chachutne potrebe thaj interesija e zaednicake.

O politicka (gadzikane) partije dzanena sa akava em adaleske koristinena akava sistemi lenge ko korist. Ola na osetinena obrvrska te isporacinen rezultatija, soske dzanena deka ko naredna izborija i isto shema ka koristinel pes palem, isi Romane partije kasar ka dogovorinen pes troshkenge thaj licno-partisko interesenge, em pale isto teatarsko prestava ka izigrinen e Romane publikake.

I Romani zaednica mora te promeninel piri politicko strategija, namesto te adzikerel pes milost taro Gadzikane partije, potrebno i te roden em te podrzinen lideri savo :

• Ka ovel le avtonomnost ko pregovorija, Lideri savo ka postavinel zorale uslovija angleder te den podrshka nesave koalicijake, dogovoreja savo ka ovel le jasno vremensko ramka em mehanizam bashi odgovornost.
• Postizborno monitoring, so obecinga pes so kerela pes, em soske na kerela pes.
• Dolgorocno politicko vizija e zaednicake, namesto te keren kratkorocna pazarlukija ko interes samo e partijake em e familijake, o fokus trebola te ovel ko kreiribe odrzliva em dolgo rocna strategija bashi sistemska promene ko korist e zaednicake.

O Roma zasluzinena but povishe na samo adala predizborna vetuvanja thaj politicka manipulacije. Sa dzi kote na pregovorinel pes ili pa khuvela ki koalicija bashi chachutne thaj sushtinska promene i Romani zaednica ka ovel ko akava hali, ko savo anena amen amare Romane aghar vakerde prestavnikija!

About Author

andrijano

See author's posts