Ulem amenge sar Sok za rastvaranje !

Avdije sijem nedela em dive bashi Kolumna, shaj buten ka Shokirinel o naslov ili pa ka soglasinen pes mancar, ama dikhava deka ulem amenge sar Soko rastvoribaske ko pani.

Sekoj nekad ko amaro dzivdipe probingem asavko soko, taro corolipe ili pa taro trendi.

Te objasnina soj tano soko za rastvaranje e poterne generacijenge, adava tano koncentririmo soko ko razna ukusija, phabaj, pomarandza, jagodka, mandarina, bostani abe skoro taro sa o ovoshje isi adava soko, kova sar prvicno materija nashti pijeja le direktno nego mora te chive 1/10 ko pani za da te dobine o soko kova shaj te pijel pes.

Ama soske bash ka povrzinav o Soko za rastvaranje akale kolumnaja, adaleske so ulem amenge soko za rastvaranje, adaleja so dozvolinaja te rastvorinen amen, te keren amen ne-moknja em dozvolinaja amen populisticko te ana amen dzi ko asavko stepeni.

E na Romenge odogovorinela aghar te fragmentirinen amen (te rastvorinen amen ko pani) za da ma te ova jako koncentririmi zaednica, sekoja Politicko partija (Romani) skoro funkcionirinela aghar adaleja so dzana em fragmentirinena amari sila, a jek tari naj bari sila so isi amen adava tano amaro Glaso ko izborija.

Prvo so rastvorinena amen mashkar amende adala sijem amen korkori, soske isi nesave manusha kola so taro bi dzandipe shirinena bi_dzandle informacije thaj kreirinena javno mislibe bizo te dzanen ola da so znacinela adava, nekoj taro nezadovolstvo, nekoj taro interes a nekoj pa tari ljubomora.

Vakeraja deka odredena manusha trebola te reshinen i Romani problematika, koleja absolutno slozinava man, ama sar shaj te reshinel pes i problematika ako na sijem vkljucime ko politicka procesija em sistemi?

A sar te ava dzi ko politicka procesija em sistemi ? Adaleja so trebola jek puti sarine mashkar amende te osvestina amen, te sikljova taro javera etnicka zaednice sar shaj avaja em ovaja delo taro politcko proces em sistemi.

Tari javer strana trebola te puca amen soske dzi akana na sine kreirime uslovija te ova delo taro adava politicko proces em sistemi ki drzava, koj kreirinela adala uslovija ? O Politcka partije koja tani lengiri uloga te anen uslovija za da te ova delo taro proces em o sistemi.

Gele but bersh, hari po hari avaja ko svest deka aghar na dzala, e akana trebola te pucha amen so isi amen sar kapaciteti em dzandipe te bi shaj ko naredna bersha ovaja delo taro procesija em sistemi, ma te ova iluzionistija deka isi amen magicno stapce em deka shaj odma te reshinen pes odredena problemija.

Diskusije kerela pe ko socijalna mreze, deka o odredena manusha trebola te reshinen o problemi, epa adala odredena manusha nane ni ko politicko proces a but hari isi amen ko sistemi, sar shaj amen te zamenina e drzava ko reshibe problemija, keda nane amen nisavo kapaciteti te ana len dzi ko adava deka o drzave trebola te reshinen em te implementirinen sa adala strategija em planija e romengere poshto o Roma sijem ko ustav sar etnicko zaednica isto pravoncar sar sa o gragjanija ki adaja drzava.

Sa dzi kote amen sar zaednica na smeninaja amen taro Sok za rastvaranje te ova koncetrati soko, te na dozvolina odredena manusha te manipulirinen amare Glasija em te rastvorinen amen, panda but bersha samo ka diskutirina mashkar amende a nane te ova nisavi tezina ko proces em ko sistemi.

Bashi reshibe momentna problemija, sovetunaja nekoj taro Roma te phravel Humaninatrno organizacija koja ka kerel ko teren buti te shaj kratko rocno pomosh te del e Romane zaednica, a ako mangaja te gradina sila kapaciteti, onda mora te razmislina deka vakti tano te kheda amaro motivi amari jag, amaro patriotizam amari vizija ko jek than, a na te kera amen po pametna mashkar amende te frda calumi mashkar amende em te dozvolina panda te ova Soko za rastvaranje !

About Author

andrijano

See author's posts