mai 28, 2024

24h Information

"Nashti uvek te slozina amen olencar, ponekad mora te ova protiv olende"

Siklilem li nesto ko palune 30 bersha ?

Dikhindor sar unapredinela o opshtestvo, vestacko inteligencija, internet, socijalna mreze, borbe ko po vise regionija, kreiribe neve drzave thaj panda but javera bukja, trebola te pucha amen dali siklilem nesto ko palune 30 bersha.

Siklilem em svesna sijem deka amaro Romano politicko koncepti kova so kreiringem le amen korkori amenge tano ne-uspeshno, deka asavke politikaja na reslem nigde dur, nego achilem ko than kova so sijem sine (diskriminacija, iskljucime taro sistemi, iskljucime taro pazari e bukjake em red javera bukja).

Frdaja sine em panda frdaja i krivica upra ko na romane politicka partije thaj liderija, deka ola na dena amen so trebola amen.

Epa ili amen sijem mrzale pa adzikeraja o javera te den amen ( so adava ko nisavo politicko sistemi na slucinela pes), ili pa amen sijem amare dusmanija so na mangaja te kera jek Romani politicko linija koja ka braninel o Romane interesija ko politicko sistemi,dikhibaja deka sijem « bikime buljengere » izvininen ko izraz, em prastaja palo troske so ka den amen o gadje na adaleske so vredinaja sar po edincija, nego so spionirinaja amare konkurenten ki politicko scena, soske o bajrushi te ovel le privilegije keda shaj mande te oven man.

Fakti tano deka nane amen politicko kultura sar zaednica, prvo sar ka astare taro manusha kola isi len politicka partije dena losno primer, adaleja so nane tane opoziciona, primer e javere romane partijake kolaja so na bi slozinena pes ki programa ( ako isi da nesave romane partija programa), adaleja so ola da dena losno slika ki zaednica em nasavena i politicko doverba ki zaednica.

I zaednica dikela, manush isi le politicko partija thaj dikhela samo pe dvoroske( chavenge, familijake itn.) a e manushenge kolen so hovavena em mutinena ko pire mitingija sigate bistrena len odma palo dejbe o oficijalna rezultatija tari drzavnno izborno komisija.

Politicka patriotija nane amen sar soj tane o javera zaednice (chibane, khoraja, srbija, vlahija em cak sto vishe o bugarija), o javera dikhena prvo e zaednicakoro interes sar te chiven le ko prioriteti, pa posle ako shaj gurinena nesave javera politike adava bi ovela jek baro plus.

Dali tano cachutno vakti te kheden pes adala so mislinena deka mangena te pomozinen em te pridonesinen e zaednicake, te beshen em te keren jek linija i « LINIJA E ROMENGE » kote so amenda o Roma zastapine preku adala manusha ka shaj te dikha o sistemska promene, thaj cache te ova delo taro opshtestvo kaj so zivinaja.

O Romane glasacija tari 2to izborno edinica achile bizo Romano prateniko, amen namesto te mnozina o pratenikija em ko javera izborna edinice te ovel amen, amen achilem bizo nisto.

Pa sar ga gurina Politika ki drzava koja ni naj hari na sijem lenge bitna ko aktuelna politicka momentija, kola ola isi len pire prioritetija.

Adaleske trebola amen te cida o horo e Romengoro.

Siklilem li nesto ko palune 30 bersha ?

About Author