septembre 24, 2021

24h Information

"Nashti uvek te slozina amen olencar, ponekad mora te ova protiv olende"

Patriotizam ko AZERTY ili ko QWERTY

Dikhaja ko posledno vakti bajrola o Romano virtualno PATRIOTIZAM ko AZERTY ili QWERTY (zavisinela savi tastatura isi amen)

Adaleja so sar zaednica mangaja samo te sikava korkori mashkar amende deka sijem po pametna, po silna em deka sikavaja amare danda mashkar amende, ama nisar na prevzeminaja o problemi ROMANO te astara le tari sustina taro izvor pa sa te ana le dzi ko reshenije.

Ki jek miri Emisija (sekova 2to Petok taro masek ko Roma News) anavkerdi bizi cenzura, vakergum ili pa predizvikujngom sa e aktivno manushen dali ki politika, Ngo, Dvizenja ili pa individualna Romane aktivistija te len jek problemi te zavrshinen le taro A-Z, no nikoj na reagiringa shaj adaleske so na sijum lenge interesno ili pa pipinava ko damari kote so tano o cachipe.

Bershencar kerela pes buti upra ko razna narativija te shaj smeninaja e na romen prema o roma, em educirinaja e Romen sar ola te smeninen pire narativija, adaleja so ako dikhaja i situacija ko adala drzave kote so isi amen aktivna aktivistija, nane kuznae so kerdo buti ni prema o na roma ni prema o Roma.

Dokaz adalestar tani i aktuelno situacija so panda borinaja amen nesave tockencar kola so ko avdisutno vreme 21to veko ni na trebona vishe te oven spomnime.

Trebola li te nakha ko jek javer cekori ? Oja javer cekori te dza te sikava sar pishinaja ko AZERTY em ko QWERTY e institucijenge em te astara odgovorna adale manushen (Romane) kola so prestavinena amen, ili pale avaja ko isto (Oja o Andrijano pishinela em vakerela o cachipe so dikhaja te uchara le) deka sekoj dikhela piri funkcija te zadrzinel, keda puceja len so shaj te kera te shaj aktivirinaja nesavo problemi o odgovor lengoro skoro uvek tano isto  » O chaveja kaj shaj mareja tut e drzavaja » Epa adaleske ajde te bistra e drzaven te da amen primer amen sar te zajaknina amen sar zaednica pa posle te ovel i drzava amendar zavisno ( na sijem bari sila ) ili pa tegani keda ka beshen ko astali neshto te roden e Romenge te ovel shundo em realizirimi, a na samo te uzivina tumen Likencar ko tumare Fb profilija kote so chivena slike taro razna lokacija kote so slikinena tumen, osven o Fb nikoj na pamtinela dala slike so kerena em so publicirinena ko socijalna mreze, keren nesto so ka pamtinel celo zaednica.

Dzanava deka but dzene ka citindor akaja kolumna ka penen « ajde be o Andrijano pale nesto izvodinela, pa so kerga ov? » — Ake pred te puchen me ka odgovorinav ko adava puchibe so bi shaj postavinena le mange ili te keren tumenge lafi tumen mashkar tumende.

Andrijano Dzeladin tano, kova so probinela taro tumare sitna rezultatija, pishibaja ili pa Emisijencar kola so opfatinena razna aktuelna teme, te iranel o nashavdo poverenje taro narodo ko politicka Liderija, Nevladina Organizacije em poedinacna Aktivistija…. Te shaj phravaja o Romano Drom e cachipnaskoro e idno generacijenge

Keren Follow amari Facebook Strana Roma News

Keren Like em Follow ki amari facebook Strana Oven Saste


This will close in 30 seconds