Intervju e Romencar tari Dijaspora Sami Dzemailovski

Sar so sine tumen shajsarin akala dive ko Roma News te citinen amare intervju e Romencar tari Dijaspora, avdije amaro Misafiri bashi Intervju tano o Rajo Sami Dzemailovski,  djeno so oformiringja hem lako presedniko  tari romani organizacija Carmen eV taro Duseldorf Germanija

RN: Shukar dive em ov sasto so prifatingan te ove amenge misafiri.

RN: Rajo Sami dali shaj te vakeren amenge kozom vakti sar zivinena ki Germanija ?

SDZ: Aljum sar chavo 5 bersh, pal odova ko 32 bersh,  sa zajedno 37 bersh sijum ki Germanija.

RN: Savo drzavljanstvo isi tumen?

SDZ: Panda isiman Makedonsko, pal dingjum hem adjarava te resel sigate o germansko.

RN: Rajo Sami, tumen sijan Romano aktivisti, sijan sherutno ja presedatel ki Romani Organizacija Carmen e.V ko Duseldorf ko NRW. Shaj li te vakeren hari pobuter tari organizacija so i tumenge sherutne teme ja aktivnostija?

SDZ: Isijamen pobuter cilija. Te zojrarkera amaro romano amalipe-manushen, te pachan an peste, ko plo kvaliteti hem te den pobaro angazmani- zor  bashi ple manushikane hakoja-pravija. Aver keraja afirmacija amare romane kuturake, umetnost,  amare djivdipastar , save problemija isiamen, i normarlano borinajamen mamuj i diskriminacija, rasizam hem sa o stereotipija so kerenape upro amare Roma. Zojrarkeraja e ternikani buti, skola, e djuvlikane aktivnostija hem angazmani hem aver.

RN: Dali valjani e Roma ki Dijaspora te oven povishe aktivna  ki Politika.

SDZ: Oja, valjani. Amen djivdinaja bershenca ko akala riga ja drzave hem normalno ola ule amare pufja. Bashi akava razlog amen valjani pobuter  ki politika te angazirinamen. Amen dji akana amaro angazmani sikavgjam preko nevladine organizacije NGO, pal valjani amaro angazmani valjani te aktivirina ko polotikane partije ki Germanija, te shaj amari buti hem  cilja te realizirina.

RN: Kozom i sorabotka ja komunikacija mashkar e romane aktivistija ki Dijaspora hem ki Makedonija ? 

SDZ: Siamen nesave kontaktija, pal ola nane odobor bare, ja te shaj te anen nesto pobuter. Valjani pobuter te komunicirina, te shaj ulava pobuter amaro djivdipaso iskustvo a odoleja ka zojrara amari buti hem o rezultatija.

RN: Ka ovel popis ki Makedonija thaj i Dijaspora shaj te popishinel pes, sar shaj  tumen te pomozinen?

SDZ: Nasiam informirime but ko detalia. Bi ovel sine shukar te ova informirime tari drzava , ja poshukar taro amare romane politikane partije . Pal mange nane pendjardi ni jekh kordinirano akcija tari nesavi politikani romani partija. Sa jekh amen ka da pobaro angazmani te shaj pbaro gendo manusha te ikljoven ko popis, pal anglo odova ka valjani amenge oficionalna informacije.

RN: Soske ka ovel vazno akava popis e Romane zaednicake em ko jekh e Dijasporake?

SDZ: Darava kaj hem akava popis nane te sikavel e chachuno gendo e romane populacijako ki Makedonija. Pbuter Roma ka sikavenpe sar Cibane,Koraja , ja etnikane Makedoncija.Oodva i o chachipa! Avera nacije kerena sa te shaj so pobuter o hangoja ja glasoja e romane populacijke te dobinen. Odoleste si ola uspesna! E Korani populacija nane pobari tari romani, ama bahtake e Romengre brojkenca save vakerenape sar Koraja lengor ola ovena anglo amnede hem dobinena benifit. Odova bi ovel sine avercane kana bi iklovena sine  hem te vakerenpe savore sar Roma. Odova i ki Makedonija hem ko  pobuter drzave ki istocno Evropa, 10% taro sasto manushipa, odova sikavela 200.000 Roma samo ki Makedonija, akala i brojke tari EU.

RN: Sar shaj motivirinaja e Romen ki Dijaspora te popishinen pes sar Roma?Sar avgo odola so na deklarinenape sar Roma ?

SDZ: Oodva ka kera amare porakenca, palo specijalna mreze hem amare clenoja-dzene  so i ki organizacija.Pal sal so vakergjum sa akaleske ka valjani amange oficionalno informacija tari Makedonija ja Romane politikane akteria !

RN: Savi poraka ka bicgave ko Roma so zivinena ki Makedonija a na deklaririnena pes Roma?

SDZ: Nane soske te ladja, valjani te ova ponosna. Odola da Roma so na djanena romane, ola da i Roma. Odoleja so keraja  aver chib te vakera, korani, chibani ja makedonsko , na kerelamen te ova Koraja,Albancija ja Makedoncija , odoleja sal ovavaja mari godi.

RN: Oven saste akale lafi keribase

SDZ: Oven saste. Upre o Roma. Vazden tumare Shere! 

RN: Roma News

SDZ: Sami Dzemailovski

About Author