mai 28, 2024

24h Information

"Nashti uvek te slozina amen olencar, ponekad mora te ova protiv olende"

E Romen nane len lengiri sopstveno drzava palo 2to sumnaleskoro maribe: kompleksno puchibe

Palo 2to sumnaleskoro maribe, but etnicka zaednice realiziringe pumare nacionalna aspiracije preku keribe neve drzave ili pa redifiniribaja neve granicengere. Ama mashkar sa adala aspiracije achili jek grupa koja na dobinga piri drzava, a adala tane o Roma. Pricina bashi asavko osustvo tari nezavisno romani drzava tane pobuter komplicirime bukja kola iranena pes ki istorija em ko politicka puchibnja kola produzinena ko avdisutne divesa da.

Geografsko dispersija: Jek taro glavna pricine soske o Roma na dobinge piri sopstveno phuv tani amari geografsko dispersija. O Roma tane dijasporsko zaednica prisutno ko pobuter phuvja ko sveto, glavno ki Evropa, ama isi em ki Azija em ko javera kontinentija. Akaja dispersija otezninela o razgranichibe tari nesavi odredeno teritorija bashi Romani drzava em bi ovela phareste te defiririnen pes jasna granice kote bi trebola (shaj) kerela pes Romani drzava dikhibaja deka o Roma sijem ko pobuter regionija.

Nanibe megjunarodno podrshka (volja): Ki razlika taro javer etnicka grupe kola uspejnge te stekninen sopstveno drzava, o Roma na uzivinge ko isto nivo tari megjunarodono podrshka. O kauze e Romengere na dobinge isto vnimanije ili diplomatsko pritisok sar o javera grupe, kova so poprecinga o obid bashi nezavisno Romani drzava.

Istorija tari diskriminacija: O Roma istorisko soocinena pes e diskriminacijaja, stigmatizacijaja em o progon ko po buter phuvja, but cesto o Roma tane dikhle sar autsajderija,strancija em ne pozelna manusha e drzavenge, so angja dzi ko iskljucibe em marginaliziribe e Romane zaednica. Asavki kontinuirano diskriminacija chinavela i sposobnost e Romengiri te roden pire pravija em te dobinen teritorija ili politicko avtonomija.

Politicko slozenost (kompleksnost): Ko pobuter evropakere phuvja, kote so dzivdinena ko baro broj i romani populacija, o puchibnja phanle e statuseja thaj o pravija e Romengere tane slozena em politicko osetliva. Keribe nezavisno romani drzava bi ovela pharo te resel pes bizo prvo te reshinen pes akala buvle puchibnja, sar soj tane integracija, obrazovanie, pristap dzi ko vrabotuvanje em i borba protiv i diskriminacija.

Nedostatok taro obedimo Romano politicko liderstvo: O Roma nane homogeno grupa em nane len centralizirimo politicko rakovodstvo ili megjunarodno priznajmo entiteti so ka prestavinel len, akaja fragmentacija phareste kerela o mobiliziribe bashi zaednicko kauza em ogranicinela o vlijanie e Romengoro ki globalno politicko scena.

Sekole drzava sine la pire nacionalna prioritetija: Palo 2to Sumnaleskoro maribe, but evropakere drzave zaniminge pes pire sopstveno rekonstrukcijaja. reorganiziribe lengere granice em konsolidiribe taro lengoro nacionalno suvereniteti, otkolku te dikhen e potikne malcisnko grupen sar na primer e Romen.

Soske jek dive te na nakhavel pes akaja barijera, pa o naredno politicko organizirime romane generacije, te ostvarinen jek asavko nesto, ama dzi adava te ovel amen trebola panda te borina amen bashi amare pravija, priznavibe sar etnicko grupa ko odredena drzave kaj so dzivdinaja em te chivel pes krajo e diskriminacijake thaj e marginalizacijake koja pretrpinela i Romani zaednica. O predizvikija tane but bare ko ostvaribe amare celija, ama e Romenge achola pharipe tari istorija, politicka em socio-ekonomska faktorija kola kerena panda po pharo o resibe dzi ki nesavi Romani cel.

Samo slozno obedino politicko organizirimi zaednica shaj phagela akava zido !

About Author