mai 28, 2024

24h Information

"Nashti uvek te slozina amen olencar, ponekad mora te ova protiv olende"

Daraja amen korkori AMENDAR !

Amaro hali na ovela, nashti niked neshto te kera poshukar amendar amenge.

Pale optimisticko dikhava o bukja kola tane phanle e Romanipaja, ama achovava bizo lafija keda dikhava sa so slucinela pes deka DARAJA AMEN KORKORI AMENDAR !

O Romano problemi tano but baro, ako trebola te pucha experten kova problemi tano o naj baro e Romenge, ola da ka achon bizo lafija em na ka dzanena te chiven prioritetno problemi, soske sa o problemija tane prioritetna.

Diskriminacija, Socijala, Kherutnipe, Obrazovanie, Bukjarnipe, Pravicno zastapenost em panda but red javera bukja, ama akala nasti resinena pe magicno kashteja, nego shaj te reshinen pes hari po hari ako sarine vlozinena piri expertiza ko pravilno problemi.

Zanesinaja amen deka shaj te ovel amen jek svetsko lideri ( vodici) adava tano samo suno, ni po-edinco a ni pa nesavi organizacija ili fondacija shaj te zastapinel sa e Romen ko Sumnal, soske o Roma geografsko sijem razlicna, ko tabijatija, ki kultura em ko problemija.

Amen nane amen nisavo organiziranost e zaednicaja ko lokalno nivo, ic ma te kera lafi ko nacionalno ili pa regionalno nivo.

ME puchava man jek buti, « Daraja li amen korkori amendar? »

Soske puchava man akava, ajde te dikha kola kapacitetija em resursija isi amen ?

Avdije keda kereja jek habe, ka la ko primer i turlija, ako sekova zelencuk cidela pe ki strana em vakerela deka ov tano naj vkusno tegani adaja turlija nane turlija.

Isto adava slucinela pes em ko Romane aktivistija, Politicka Partije em Nevladina organizacije, sarine tane samo bendisana em sarine mislinena deka o javera olendar tane zavisna pa thaveja mangena te vodinen i igra sar marionetke.

Greshinena soske sarine ako chivena o resursija so isi tumen, manushikane, dzandibaskere, financiska, me verujnava deka but po sigate ka arakhel pes reshenije e Romane problemenge, me isi man jek lafi so koristinava le cesto :

« Sekole probleme isi le reshenije, ako nane le reshenije onda nane ni Problemi ! »

Darana li korkori tumendar, na sar individuala, nego Rom e Romestar ?

Soske na beshena em te pendzaren o kvalitetija sekaskere em te chiven len ki jek Borba i Borba e Romanipaskiri ?

Sarine vakerena trebola amen pare za da te reshina o problemi e Romencar, tocno pare trebola, ama me ka vakerav Pare isi te shaj kerela pes buti ko arakhibe reshenie e problemenge, ama keda dikhaja o pare bistraja o problemija em teganni keraja amenge razna filmija sar te zloubotrebina adala pare ko licno interes.

Isi fondacije so isi len pare, isi Nevladina organizacije so isi len dzandipe ko keribe buti, isi Politicka partije so shaj te zastapinen e Romen, isi zaednica koja tani spremno te podrzinela o procesi e Romane angle dzajbaske, ama Daraja li amen Korkori amendar ?!

Me pale ka vakerav, sa zavisinela amendar sar kak kera amenge, ko nekozom tocke shaj but posigate ovaja stabilna faktorija ko nekozom drzave ko Balkan.

  1. Zorali organiziranost e zaednicaja ko teren (Ngo)
  2. Zorali (stabilno) Politicko zastapenost
  3. Zorale pravnikija so ka koristinen sekoja zakonsko dupka ko korist e Romenge
  4. Zorale politicka pregovaracija, kola troshkenge nane te prifatinen koalicije

Akate shaj panda but tocke te dodajnen pes ama ako isi amen akala 4, but posigate o drumo ka phravgol amenge.

Daraja li amen Korkori amendar ?!

About Author