O Roma akava o Roma okova, o Roma diskrinimirime, o Roma maltretitirme, o Roma iskljucime taro sistem, o Roma nane Politicko zastapime. Borinaja amen akala stereotipija te mudara len, ama nisar te uspejna kriva amenge o gadze, o institucije ili amen (na) sijem (NE) iskrena?
Jek taro naj baro Romano kvaliteti so isi amen sar zaednica tano « Ov nane shukar, me sijum poshukar », ama nazalost akava negativno kvaliteti dzi akana ki praksa nan ingarga amen dur sar zaednica ko upre navedime stereotipija.
Ko adava buti keribe ili pa sar sekole mostar o lafi ikljona « Borinava man e Romanipaske » ki adaja borba kozom sijen (NE) iskrena?
Ne uspeshno reprezentiribe
O ucestvo e Romengoro ko politicko zivoto pretpostavinela pe deka tano vektor bashi empancipacija em napredok. Ama i vnimatelno analiza sikavela deka but Romane politicarija ki Severno Makedonija na uspejnge te ispocitijnen akaja misija. Namesto te zalaganinen pes bashi o pravija pumare zaednicakere em te borinen pes bashi chachutni ednakvost, ola dozvolinena te oven korumpirime taro sistemi, lejbaja o vitalna resursija em keribe predavstvo pire glasacenge (zaednicake).
Korupcija thaj nepotizam
Postojnena faktija deka odredena Romane politicarija thaj manusha kola kerena buti ko nevladin sektor koristinena pumare pozicije te barvakeren pire familijen thaj prijatelen, namesto te keren buti ko shukaripe e zaednnicake. O sredstvija namenime bashi programe bashi podrsha e Romenge cesto zlo upotrebinena pes ili pogreshno upravime, koleja sprecinela pes i implementacija taro kljucna proektija bashi poshukaribe uslovija dzivdipaskere. O Romane politicarija kola trebola te obezbedinen pravicno em efikasno distribucija akale resursengere, but puti arakhljagjovena ko korupciska (na objavime) skandalija kote so zagrozinena i doverba e Romane zaednicakiri.
So obecinena, retko ispolninena
O izborna kampanje tane pherde obecibaja, poshukar obrazovanie, uslovija bashi domuvanje, socijala, vrabotuvanje itn. Ama, akala lafija but sigende nashavgjona ili pa potocno odma taro tajsutno dive keda nakhe o aluzariba, soske palo alusariba olengoro fokus tano bashi lengoro sopstveno angle dzajbe, so ka perel lenge savo delo ola ka len em sar te zadrzinen pumare privilegije, namesto te ispolninen o obecimo pire zaednicake.
Unishtuvacko impakt upra ki zaednica
Direktno posledica taro akava (NE) iskrenost tano i razocarimi Romani zaednica, i nada bashi vidliva rezultatija perena angla ko realnost taro pogreshno politika koja kerela pe, osobeno ko terne Roma kote gubinena naa em nashti arakhena pozitivno modeli so predlabocinela lengiri marginalizacija ep potikninela vidlivo iskljucenost taro politicko sistemi e drzavakoro.
Hitna reforme tane potrebna ko Romanipe
Te bi shaj chinavela pes akav magicno krugo, taro kljucno znacajne tano i Romani zaednica te rodel po bari transparentnost em chachutni odgovornost taro sa o aghar vakerde prestavnikija. Akava rodela pobaro politicko obrazovanie, po vishe te phraven pe jakha i zaednica em aktivno podrshka kandidatenge integriteteja em cachutne manusha kola tane posvetime ki borba e Romane kauzake, thaj mora te vostpostavinen pes efektivna kontrolna mehanizmija za da te dikhen pe kaj dzana o javna sredstvija ki dzepa nekaske ili koristinena pe pravicno em korisno.
Eticko thaj inkluzivno politika
O necesnost odredeno politicarengoro ki RSM nane samo predastvo taro doverba pire zaednicakiri, neko tani em bari precka bashi inkluzija celo zaednicakiri. Te shaj te dzal pe angle, taro sushtinsko znacaj tane i Romani zaednica te mobilizirinel pes em te rodel eticko, transparetno prestavibe orientirimo ko sa shukaripe celo zaednicakoro. Bashi poshukar dzivdipe em ovibe delo taro sistemi na zavisinela taro gadzikane politicka partije, nego zavisinela taro sposobnost e prestavnikongoro sar ola ka roden e zaednicake olengere pravija, pravda integriteti thaj posvetenost olendar te pridonesinen kolektivno a na indivudualno.
Kozom samo shaj ovaja ISKRENA em te khuva ko bare pajna, o pajna e politcko sistemeskoro ko pridones e ZAEDNICAKE.
About Author
More Stories
Shaban Saliu- Selektivno ili zrtva e pravosudsko sistemeske ?
8to April: I Romani Nacia Afirmirinela Piro Suvereniteti
Roma jekhe diveske -Kolumna Mustafa Demirovski