mai 28, 2024

24h Information

"Nashti uvek te slozina amen olencar, ponekad mora te ova protiv olende"

Ajde te reshinen o Romane problemija !

Jek taro naj baro na-haljovibe mashkar amende sar Romani zaednica tano adava so na sijem dovolno informirime sar funkcionirinela jek sistemi ki drzava kote so dzivdinaja.

Ko posledna bersha baro revolti isi ki Romani zaednica kote but problemija e Romane zaednicakere nane reshime, sar naprimer i Socijala o domuvanje, obrazovanie, zdrastvo em red javera sekoj dnevna problemija kolencar soocinela pes i Romani zaednica.

O revolti tano apsolutno prifatibaske, ama so nane prifatibaske keda po edincija taro licno ego shirinena dezinformacije, kreirinena panda po baro revolt ki zaednica a bizo olada te ovel len nesavo reshenie sar te reshinen pes odredena problematike kola tane povrzime e Romane zaednicaja.

Nashti ovaja manusha kola samo chungaraja upra ko sekova cekori so lela pes nesto te kerel pes, dali adala odredena manusha (populistija) kerena olada adava taro bi-dzandipe, a keda probineja te objasninen lenge automatski tu sijan adava o naj loshno manush, tu sijan o chor, tu sijan o manush so predajnela pire zaednica em red javera bukja, a so kerena ola te haljoven koj trebola te reshinel o problemija.

Ajde ka probinav pale palo X puti te objasninav, koj kaj haljol ok, koj na adava i adava :

Pobuter puti em svesna sijen adaleske deka za da te reshinen pes nesave problematike, adava na zavisinela mandar tumendar ili odredeno manushendar licno, adava zavisinela taro odredena institucije ministertsvija thaj korkori i Vlada.

E adava puchibe trebola te pucha amen, dali bizi politicko sila em pravicno zastapenost ko sistemi shaj reshinaja o problemija ? Keda nane amen nisavi politicko zastapenost koja ka kerel looby, pressing upra ki Vlada, Ministerstvija thaj te vodinen cachutni politika kote na trebola te pucha dali ko interes e zaecdnicake nego te kerel politika ko Sistemi ?

Epa amen nasti pocminaja za zal ni jek problemi te resina le soske ko samo iskustvo thaj i istorija sikavga deka na sijem politicko zastapime ko sistemi nikastar, o politicka partije trebola te keren adaja buti soske adaja tani lengiri funkcija ola tane odgovorna bashi kreiribe strategije thaj planija bashi implementacija thaj arakhibe politicko odgovor sar o ROMA te zivinen po shukar ki adaja drzava.

Na sijem politicko organizirime, na dzanaja kozom i vazna o izborija em sekaskoro individualno glaso, amen dozvolinaja ko vakti e izborenge odredena manusha te manipulirinen amare glasija, te ova mediumsko (gadzikane mediumija) afirmirime deka ko izborija kerela pes korupcija kinindor o Romane glasija, daravena amen so ko dive e izborenge ko romane mahale ko izbiracka thana anela pe baro numero tari policija za da te impresionirinen amen ( tari dar te glasina e odredeno manushenge)

Amen meshinaja babe em zabe, ki sekoja socijalno mreza mangaja samo te ova vidliva thaj ki sekoja tematika te komentirina te umalovazina odredeno manushen a bizo te ovel amen pojma tari adaja tema, ko sprotivnno ako isi amen dzandipe adale temakoro onda trebola te ikljova em razlicno pristap te kera ki zaednica thaj vakeribaja  » o Dzemsiti (imaginarnoo licnost) na kerela akava shukar me predlozinava oleske akava te kerel pe za da te reshinel pes akava problemi » Amen chungaraja bizo te pucha prvo korkori amen so shaj amen pridonesinaja ko anibe poshukaripe e Romane zaednicake.

Ako mislinaja deka peravibaja e Rome kova nesto predlozinela a nane le nisavi podrshka ili predlog sar te kera zaedno buti, panda but bersha o na Roma ka ciden amen ki strana thaj nane te den amen prioritetija bashi inkluzija ko sistemi.

Nekozom taze primerija thaj uvek o puchibe so puchena pes, em o populistija so koristinena sar argumentija.

Kaj o Ambulantno vrda so doniringa le o RIO thaj i AVAJA ?

– O Ambulatno vozilo sine donirimo sar odgovor odredeno institucijenge,, soske uvek vakerena nane amen dovolno vrdija, RIO thaj AVAJA kerge adaja donacija za da te penen « OK, ake amen donirinaja o vrda », dali promeninga o pristap taro Ministertsvo em o Zdrastven Dom ? NA soske akana nane amen zorale politicka prestavnikija so ka kreirinen, ili kreiringe politicka uslovija adava ambulantno vrda te ovel sar punkti ki Komuna Shuto Orizari, akate tani i uloga e Politikakiri nane e organizacijengiri ili e gradonacalnikoskiri ili pa indivudalcengiri.

Dujto taze primer tano, 5 Romane studentija na sine primime ko Medicinsko fakulteti ko Skopje, akate i uloga e Organizacijengiri tani te oven glasno govornikija, korektorija asavke odlukenge pa em te i potrebno te keren protestija, ama pale avela ko odgovor isi li amen politicko zastapenost so shaj te kerel pressing ki vlada em ko Ministerstvo ?

isi amen but javera primerija kola shaj na brojnava len, ama trebola te haljova jek buti (osven ako taro inati na mangaja te haljova) BIZI POLITICKO ZASTAPENOST na keraja nishto !

Ko krajo ka pishinav, ako mislinena deka adava so kerena le dzi akana tano o naj efikasno nacin, ondak Ajde te reshinen o Romane problemija !

About Author