janvier 27, 2023

24h Information

"Nashti uvek te slozina amen olencar, ponekad mora te ova protiv olende"

2023, Pocetok e Krajoskoro !?

O nevo 2023 bersh, ka ovel li o pocetok e krajoskoro ?

Pocetok, soske nadinaja amen deka o na zavrshime bukja e Romane problematikaja ka oven javer chane buti kerde te bi shaj kerela pes nevo pocetok e Romane puchibnaske.

Ako trebola neshtoske te chivel pe kraj, me bi chivava nesave tocke kola bi trebola te oven amenge prioriteti ko akava 2023 bersh.

  • Individualno buti keribe (licno a na e zaednicake kolektivno)
  • Fantomija (te reshinell pe o problemi e manushengoro bizo licna dokumentija)
  • Na pochitibe i pravicno zastapenost sprema o balanseri
  • Na sprovedibe i pishimi strategija e Romengiri (Budzeti)
  • Politicko dezorientacija (Covek partije)
  • Ne doverba ki zaednica
  • Bi ideologijakoro buti keribe
  • Dikhibe samo i Sutka sar politika ki Severno Makedonija

Akala tane nesave tocke kola dikhava len sar prioriteti, kolenge shaj chivela pe kraj bashi nevo pocetok, aj te razjasnina o upre pishime tocke

Individualno buti keribe:

Dzi akana dikhlem deka o politicko buti keribe so kerela pe ki Severno Makedonija, anela dzi ko individualno buti keribe odoleja so samo adaja partija ili adava manush dobinela korist peske (oportunizam) adzikerela prilika te bi shaj anela pire clenen ili pire semejstvo ko nesave vrabotime pozicije.

Fantomija, o manusha bizo dokumentacija:

Taro akala manusha kerela pes nekozom bersh napalal lafi, sar taro manusha kola tane ko drzavna pozicije em isto aghar taro nevladina organizacije, kola kerge buti ko mapiribe khedibe podatke e manushengere te bi shaj lengoro problemi te resinel pes. Ando tano zakoni kova so phareste implementirinela pes, pa adaleske bi trebola te chivel pes kraj ili pa te pocminel pes seriozno thaj aktivno te kerel pes buti upra ko reshibe akava problemi, thaj akana te mapirinel pe o odredena institucije kola tane precka akale reshibaske o problemi, pa palo mapiribe o institucije te kerel pe plani strategija sar shaj nakhavela pe akaja bariera.

Pravicno zastapenost thaj balanseri:

2.66% ili 2.53%, nisto nane pocitujmo ko institucije bashi i pravicno zastapenost e Romengiri ko institucije kote so trebola o balanseri te ovel pocitujmo thaj implementirimo. Na mesto o Politicka partije te dikhen jek jekhe so kerena, shaj kerena pritisok sar pozicija ili opozicija akava balanseri te ovel pocitujmo thaj chivdo ko delo, kova so ka anel o naj baro korist e zaednicake ( na te keren nepotizam) cachutno Romano kadar te chivel pe ko institucije, kola ka shaj te anen amenge institucionalna reshenija ko problemija.

Na sprovedibe i pishimi strategija e Romengiri (Budzeti):

Ki strategija koja so sine pishime taro aghar vakerde manusha tari senka, trebola te ovel po bari predvidenost thaj cachutni implementacija ko sekova nivelo, soske sprema adaja strategija anela pe budzeti bashi rezalizacija e proektengiri pishime ki adaja strategija. O budzeti bashi implementacija generalno ko sekova rebalans nashavela taro 30 dzi ko 50% adaleja so o budzeti kova tano namenimo e Romane programake ( na koristime, ili pa na kerde proektija ko vreme) zavrshinena ko javera programe kola ni naj hari nane phanle e Romane strategijaja ( ako isi da amen strategija ?)

Politicko dezorientacija (Covek partije):

Politicko dezorientacija na dzanela pe koj hala koj pijela, koj kasar amal koj kasar protivniko, koj kas umalovazinela ko Roma thaj ko gadze, partije 3-4 manushencar anglal ko jakha e Mainstream partijenge but sitna em samo bashi licna interesija. Keribe zoralo fronti, reforme ko partije pa cak sto vishe nesave partije trbola te nashavgjon taro registar e partijenge, te mukhel pe than po hrabro terne manushenge kola dikhena sar vizija em prioriteti o Romano integriteti, terne manusha kola isi len dzandipe thaj kapaciteti te anen po shukar tajsa e Zaednicake.

Ne doverba ki zaednica:

Te chinaven i slika koja isi len i zaednica prema tumende, nashavge i doverba ki politicko smisla, podrzinena tumen ili tari dar ( poshto sijen Western Cowboy’s) ili pa taro nesavo tumaro vljijanie so isi tumen prema lende sa daraja te na nasaven adava da hari so isi len. Te iranel pe o cachutno lafi POLITIKA te organizirinen e zaednica politicko po aktivno te oven dikhindor tumendar shuze primerija (kola dzi akana na sine tumen ko nakhlo bersh).

Bi ideologijakoro buti keribe:

Dikhindro tumaro pristap thaj tumaro politicko buti keribe, na sikavela deka beshela nesavi ideologija pala adava so prezentirinena le, bi programakoro buti keribe oportunisticko delujbe ki politika. Adzikerena samo te oven izborija thaj te aven ki zaednica te prezentirinen lenge, vetujnenge lenge neshto so tumen da korkori sijen svesna deka nasti ispolninena tumare vetuvanja, soske na dzanena ni tumen so kerena, nego kerena so o gadze vakerena. Te zacvrstinen jek zorali ideologija koja ka privlecinel e zaednica em ka zojrarel o identiteti te oven Hrabra em gorda Roma.

Dikhibe samo i Sutka sar politika ki Severno Makedonija:

Generalno sekole jekhe Politicko aktiviste ka shuna le deka kerela lafi samo e Shutkake, a bistrena deka Roma isi em zivinena ki celo Severno Makedonija, dali i Shutka tani mina (rudniko) parenge, pa so sarine mangena ki Shutka te vladinen ili politika te keren. O kolektivno interes tano ko nacionalno nivo, kote so prema o lokalno nivo shaj pocminena pe o promene thaj te resel pe ki jek zaednicko cel so dzi akana na dikhlem.

Akala tane nekozom vazna tocke anglo mire jakha kola so dikhava len, deka shaj te oven jek shukar pocetok e krajoske, shaj bute dzenenge adala kola so ka arakhen pes ki akaja kolumna nane te svidzinel pes, ama o chachipa tano akava.

« Ajde te pocmina te chiva krajo »

Keren Follow amari Facebook Strana Roma News

Keren Like em Follow ki amari facebook Strana Oven Saste


This will close in 30 seconds