Romane Paramizja – O devel keda kerga e Rome

Jekh šužo dive, o Devel anđa odluka te čerel manuše. Ljelja čik hem počinđa te čerel.
Ked ulo gotovo, čhivđa olje ki jekh but bari tepsija te pečol.
“Đi pečola, ka lav maje jekh dremka”, mislinđa o Devel peklje gođaja.
Palo disavo vakti, uštinlo o Devel kotar sojbe hem setisalo te ikalji i tepsija kotar šporeti.
So te dikhel o Devel, o manuš zifti kalo ulo. Tegani o Devel phenđa:
“Tu ka ove e kaljengoro dad!”
O Devel na hine baš čalo sar ulo o manuš hem manglja te probini paljem. Ljelja čik hem počinđa te
čerel. Ked ulo gotovo, čhivđa olje ki jekh but bari tepsija te pečol.
“Akana na cidava man kotar akava than”, vačerđa o Devel.
Ama, sar čhivđa, ađahare hem ikalđa i tepsija. So te dikhel o Devel, o manuš sar thud parno ulo.
Ko odova momenti o Devel phenđa:
“Tu ka ove e parnengoro dad!”
O Devel ni akava drom na hine čalo sar ulo o manuš, pa manglja pana jekh paluno drom te probini.
Ljelja čik hem počinđa te čerel. Ked ulo gotovo čhivđa olje ki jekh but bari tepsija te pečol. Ama,
akava drom i tepsija ikalđa baš ko vakti keda čače valjanđa te ikalji. So te dikhel o Devel, o manuš
dobinđa zlatno boja. Odova hine e Devlesoro najšužo delo đi akana. Tegani o Devel phenđa:
“Tu ka ove e Romengoro dad!”
Romani mitologia



Pishinga

Sead Šerifi Levin(Sejo)

About Author

andrijano

See author's posts