Mangava te phenav

Avdisutni nedelakiri kolumna naslovingjum la « Mangava te phenav », adaleja so but dzene ka složinen pe mancar à but dzene ka oven protiv adava so Mangava te phenav.

Cidaja patinaja taro aktuelno političko sistemi ki Severno Makedonija, mangaja nešto poshukar e Romane zaednicake, borinaja amen sekoj ko plo način dali Politikaja, dali aktivizmoja ili pa sar obično Manusha kola so pripadinaja ki zaednica.

Sarine phenaja me mangava mire zaednicakoro shukaripe, me dzanava sar te kerav, ama za žal panda na dikhlem ni jek uspešno modeli kova ingarela e zaednica anglal.

Shaj isi amen nesavo modeli o modeli taro EGO ili taro Covek partije dvajca bez trojca, ama organizirimo modeli e zaednicaja thaj te ova zorale ko politicko sistemi nane amen.

Akate vrtinela pes mange o puchibe, mangava nesto te ovav, Mangava te ovav gradonacalniko soske mangeja te ove gradonacalniko, mangava te ovav prateniko , soske mangeja te ove prateniko, mangava te ovav ministeri, soske mangeja te ove ministeri ?

Ako mangeja te ove gradonacalniko, prateniko, ministeri trebola prvo te puce tut sar ka rese te ove jek akalendar, koja tani ti cel so mangeja adaleja te postignine. Dzi avdije sa akala rodime pozicije kola so sine len sine ocigledno samo bashi licno interes, soske dikhaja sar poedincija unapredinge a i zaednica achile ko than.

I mok thaj i sila tani ko vasta sekole gragjaneske, soske bizo lengere glasija nasti te oven ni gradonacalnikija, ni pratenikija a ni pa ministerija, ola tane adala kola so shaj te anen tumen ko adala pozicije, ama dzi akanutno modeli na mesto te kheden pe ko jek zaednicko drom ola razdelinge pes ko 13 droma a dzanibaja deka o elektorati tano adava kova so isi amen, em deka i romani zaednica nasavgja piri doverba em cak sto vishe i politika vise na interesinela olen.

Pred nekozom dive taro miro licno fb profili pisingjum deka ako mangaja shaj te oven amen

4 Pratenikija

3 Ministerija

5 Zamenik Ministerija

8 Direktorska thana

120 Administrativna rabotnikija

Nekoj optimisticko dikhla miro status nekoj pesimisticko a nekoj pa asandilo.

Ake te dav jek tikno objasnenije akale statuseske, mada na trebola ko javnost te objasninel pes akaja strategija soske shaj te khelel posle taro gadze protiv amende, ama me osetinava potreba te phenav le.

Ako vec odoborka osetinena pes zorale o politicka partije pire koalicioni partnerencar onda akava puti trebola te sikaven deka tane jaka pregovaracija em ki 2to IE te roden pobednicka thana ko liste na po dur taro 6 ili 7to than, adaleja so adava ka garantirinel lenge direktno pratenicko than em ko SDSM em ko VMRO, posle te ikljol jek lista ki IE 2 koja ka ovel cisto Romani thaj te kheden pe lake 12 dzi ko 14.000 glasija, adava shaj keraja le ako beshaja sarine zoraleste pali romani lista znaci othar da ikavaja panda jek prateniko, em panda jek opcija bashi o 4to prateniko tano ili te mukel pes lista ki IE 3 ili 4 ili othe da te kerel pes koalicija thaj te dobinel pes dobitnicko than sar prateniko soske e solduj majnstrim partijenge vazna tane o romane glasija, e romane glasondar ka zavisinel koj ka legarel o mnozinstvo ko adala IE.

E akana ako akaja strategija uspejnela tegani trebola jako hrabrost thaj o pratenikija so ka ikljon taro gadzikane partije te povlecinen pes thaj te keren pratenicko grupa 4 pratenikoncar em tegani te sikaven o phraipe e romane zaednicakere, post izborno sekova jek prateniko tano bitno za da te shaj formirinena mnozinstvo em vlada, jek taro primerija tane i koalicija LDP/DOM kola trine pratenikoncar tane delo tari izvršno vlast, thaj isi len em Ministerija, em zamenik Ministerija em državna sekretarijata.

Tani lli akana i moderno era amenda sar Roma te kera update 2.0 ko Amaro razmislibe te cida o ego em o lično interes ki strana nego te dikha o interes e zaednicakoro, ama sa adava shaj keraja ako beshena zaedno em dogovorinena pes, isi than sarinenge soske ko posledna bersha barilo o kadar e dzandibaskoro ko Roma, ako beshena em dogovorinena pes sekaske isi than koj te ovel Prateniko, koj te ovel Ministeri, koj zamenik Ministeri, koj državno sekretari, koj direktori i lista tani but bari kote sekoj ka arakhel po than.

Sijem lli hrabra te cida jek ASAVKO drom, o drom e Romanipaske ?

Mangava te phenav-« Sekole krajsko isi početak, sekole početakoske isi krajo »

About Author