Figure ki figurativno politika, isi li shizofrenija?

Odsutno nekozom vreme bashi licna obaveze, progresivno iranava man ko adava kote so osetinava man deka sijum potrebno em sijum korisno (e zaednicake, za da te oven pravilno informirime).

Isi li Shizofrenija ko amare aghar anavkerde liderija, ili manusha apetiteja te oven BEN ta BEN ?

Cace edvaj spravinena pe lokalno aj te pena nacionalno politikaja, pap ic ma te roda lendar geopoliticka analize ili scenarijo so shaj poshukar ili pa so shaj ki akaja svetsko kriza te zashtitina e Romen?

Ko jek bijav tane kanime sarine, ama sekoj khelela peske pire muzikaja sar lenge odgovorinela,

mada isi but verbalna zelbe bashi razna UNIJE, bashi o shukaripe e Romengoro, o jekhipe e Romengoro, te ova po zorale po reprezentirime, a ustvari pala ko adala verbalna zelbe garavela pes i bokh bashi hranibe piro Ego thaj piro (INTERES).

Nakhle o parlamentarna izborija ko Romane politicka partije TISHINA, nakjle o lokalna izborija ajde jurish napadinaja amen mashkar amende ki adaja da opshtina kote (na dzanela pes kozom vreme panda ka ovel Rom gradonacalniko) isi amen Romano Gradonacalniko.

Manusha shizofrenijaja ikljona ko gadzikane mediumija pofalinena pe deka ola kerge neshto e Romane zaednicake, em kriticna tane prema o Roma angla ko gadzikane jakha, dzanindor deka o gadze ili lena amen ili ki ajgara ili pa izigrinena amen.

Ki politika sijen upreder 25 bersh, isi li cache neshto so shaj te falinen tumen sar Romane figurativna Politicarija, ili samo mora te pofalinen adalen kasar sijen ki Koalicija.

Nashti prifatinaja te vakeren deka o VMRO denga but povishe e Romen, oja denga figurativna pozicije kola sine po-edinconge ko interes, ili pa sar so vakerga o Rajo Nezdet Mustafa ki emisija  » Zaspij ako mozesh » deka ko vakti taro VMRO ov vrabotinga 80 dzenen tari piri partija, pale avaja ko adava deka nane i politika ko interes e zaednicake nego tani ko interes e partijake ili lakere manushenge.

A pa nane ni poshuhkar o SDSM, kova isi po slobodno phiribe kritikujbe em lafi keribe, ola samo vakerena ka kera ama panda izgleda na sijem lenge ki agenda neshto te keren e Romane zaednicake, ote perela i greshka ko Romane koaliciona partnerija kola so na kerena looby te chiven pes romane puchiba ki agenda, a isto aghar isi amen slabo Romani politicko opozicija koja so samo adzikerela so ka vakeren o gadze ola te keren, nane le samo inicijativno politicko angazmani.

Panda kozom vreme ka dzal te vodina isto politika, akava na kerga shhukar me ka kerav poshukar, keda aveja tu ki pozicija soske na kereja ili pa keda sijan sine ki pozicija soske na kergan ? (NA dzaneja ili na mangeja?).

Gradingen politicko iskustvo, gradingen intelektualno kapacitite (nevladina organizacije, seminarija) keda ka ikljol tumaro dzandipe ko korist e zaednicake?

Keda ka sikaven amenge deka siklilen te sikaven amenn sar te ova jek organizirimi zaednica.

Ekonomsko kriza, amen na sijem spremna te spravina amen.

Politicko kriza, na dzanaja kaj amaro than.

Energetsko kriza, komu ide zish ?

Epa cache, vreme i vishe te osvestinen tumen, ili te prifatinen i shizofrenija, deka trebola radikalna promene, deka trebola cachutne unije, vodibe Romani strategija interes.

Tumen (o politicarija) sijen dovolno pametna sar te anen korist e zaednicake, beshen ko solduj blokija em ko VMRO em ko SDSM, ama ko adala duj blokija vodinen i politika e Romane zaednicake, a na e gadzenge.

About Author